ತುಳುನಾಡ್ದ ಆಟಿ ಅಮಾಸೆದ ಆಚರನೆಡೊಂಜಿ ಆಯುರ್ವೇದ ಚಿಕಿತ್ಸೆ.
ಸಂಪ್ರದಾಯದೊಟ್ಟುಗು ಆರೋಗ್ಯನ್ ಬೆಸೆಪುನ ತುಳುನಾಡುದ ಆಟಿ
ನಮ್ಮ ದೇಶದ ಅವೇತೋ ಪರ್ಬೊಲೆಗ್ ಐತನೆ ಆಯಿನಂಚಿನ ಧಾರ್ಮಿಕ, ಸಾಮಾಜಿಕ, ಆದ್ಯಾತ್ಮಿಕ, ಅಂಚೆನೆ ಆರೋಗ್ಯದ ಮಹತ್ವೊ ಬೊಕ ನಂಬೊಲಿಗೆ ಉಂಡು. ಇಂಚಿನ ಆಚರಣೆಲೆನ್ ಅವ್ ಅವ್ ಪ್ರದೇಶದ ಅಂಚೆನೆ ವಾತಾವರಣಗ್ ತಕ್ಕಲಕನೆ ಮಲ್ತ್ ದೆರ್. ಕರಾವಳಿದ ದಕ್ಷಿಣ ಕನ್ನಡ, ಉಡುಪಿ ಬೊಕ ಕಾಸ್ರಗೋಡು ತೌಳವ ಸಂಸ್ಕೃತಿಲೆನ್ ತನ್ನ ಉಡಲ್ ದೊಲಯಿ ಕಾಪಿಯೊಂದು ಬೈಂದ್ಂಡ್ ಇಂದೆಕ್ ಮಾತ ಒಟ್ಟಾದ್ ತುಳುನಾಡ್ ಪನ್ಪೆರ್. ಮುಲ್ಪದ ಕಲೆ, ಸಂಸ್ಕೃತಿ, ತೆನಸ್ ಬೊಕ ನಂಬೊಲಿಗೆಲು ಬಾರಿ ಇಸೇಸ ಪಂದೇ ಪನೋಲಿ. ಸುತ್ತ ಮುತ್ತ ತಿಕ್ಕುನಂಚಿನ ಮರ್ದದ ಗುಣ ಇತ್ತಿನ ಬೂರು, ಇರೆಕ್ಲೆನ್ ಈ ಜನಕುಲು ಉಪಯೋಗ ಮಲ್ಪುವೆರ್.
ಅಂಚೆನೆ ಆಟಿ ಅತ್ತಂಡ ಆಷಾಡ ತಿಂಗೊಲುಡು ಬರ್ಪುನ ಅಮಾಸೆ ತುಳುವ ಜನಕ್ಲೆಗ್ ಇಸೇಸ ಆಯಿನಂಚಿನ ದಿನ. ಇ ದಿನೊತ್ತಾನಿ ತುಳುವೆರ್ ಪಾಲೆ ಮರ ಪನ್ಪಿ ಮರತ್ತ ಕೆತ್ತೆ ಕೆತ್ತುದ್ ಮರ್ದ್ ಮಾಂತುದ್ ಪರ್ಪೆರ್. ತುಳುನಾಡ್ ಡ್ ಆಟಿ ಪಂಡ ಒಂಜಿ ತಿಂಗೊಲ್ದ ಪುದರ್. ಈ ಆಟಿ ತಿಂಗೊಲುನು ಮುಲ್ಪ ಅನಿಷ್ಟ ಪಂದ್ ಪನ್ಪೆರ್ ದಾಯೆ ಪಂಡ ಈ ತಿಂಗೊಲುಡು ಕೀರಿ ಕಟ್ಟ್ದ್ ಬರ್ಸ ಬರೊಂದು ಇತ್ಂಡ್ ಐತ ಅಂಚಾದ್ ಜನಕ್ಲೆಗ್ ಪಿದಾಯಿ ಪೋವೆರೆ ಆಪುಜಿ, ಬೆನಿಯೆರೆ ಆಪುಜಿ ಬದುಕುಗ್ ಬಾರಿ ಬಂಗೊ ಆವೊಂದ್ ಇತ್ಂಡ್. ಬೊಕ ಈ ತಿಂಗೊಲ್ಡ್ ಬರ್ಪುನ ಅಮಾಸೆನ್ ಜನಕುಲು ಆಟಿ ಅಮಾಸೆ ಪಂದ್ ಇಸೇಸ ಆಚರಣೆ ಮಲ್ಪುವೆರ್. ಈ ದಿನತಾನಿ ಪಾಲೆ ಪನ್ಪಿ ಒಂಜಿ ಮರತ ಕೆತ್ತೆನ್ ಗುದ್ದುದ್ದು ಕನತ್ತ್ ದ್ ಐತ ಕಸಾಯ ಮಲ್ತ ಪರ್ಪೆರ್.
ಈ ಪಾಲೆದ ಮರಟ್ ಆಟಿ ಅಮಾಸೆದ ದಿನತಾನಿ ಬೊಡಾಯಿನಾತ್ ಮರ್ದುಲು ಸೇರುಂಡು ಪಂದ್ ತುಲುವೆರೆಗ್ ಒಂಜಿ ನಂಬೊಲಿಗೆ ಉಂಡು. ಈ ಮರಕ್ ಆನಿ ಒಂಜಿ ಇಸೇಸ ಸಕ್ತಿ ಬರ್ಪಂಡು. ಈ ಮರತ್ತ ಕೆತ್ತೆನ್ ಆನಿ ಕಸಾಯ ಮಲ್ತ್ ಪರ್ಂಡ ವೊವ್ವೆ ಸೀಕುಲ ಬರ್ಪುಜಿ ಪಂದ್ ಪಿರಾಕ್ ದಕ್ಲೆನ (ಹಿರಿಯರ) ನಂಬಿಕೆ.
ಇಲ್ಲದ ಯಾಜಮಾನೆ ಆಯಿನಾಯೆ ಅಮಾಸೆದ ದುಂಬುನಾನಿ ಈ ಮರತ್ತಡೆ ಪೋದು, ಐಕ್ ಗುರ್ತ ಪಾಡ್ ದ್ ಬರ್ಪೆ. ಬೊಕ ಅಮಾಸೆದಾನಿ ಪುಲ್ಯಕಾಂಡೆ ತರೆಕ್ ಮೀದ್ ಮಯಿಪು (ಇಡುಸೂಡಿ) ಪತ್ತೊಂದು ಪಾಲೆ ಮರತಡೆ ಪೋದು ಮರಕ್ ಸುತ್ತು ಬತ್ದ್ ಮಯಿಪುಡು ಮರಕ್ ಮೂಜಿ ಪೆಟ್ ಹಾಕ್ದ್ ಬೊಕ್ಕ ಬೊಲ್ಲಿ ಕಲ್ಲ್ಡ್ ಮರಕ್ ಗುದ್ದುದ್ ಐತ ಕೆತ್ತೆ ದೆಪ್ಪೊಡು. ಇಂದೆನ್ ಕನೆರೆ ಪೋಪುನಾಯೆ ಉರ್ಬುಲಿ ಅತ್ತಂಡ ಅರೆ ಬತ್ತಲೆ ಪೋಡು ಪನ್ಪರ್ ಬಹುಶಃ ಈ ಮರತ್ತ ಪಾಲೆ ಕೆತ್ ನಗ ಐತ ಪೇರ್ ಮೈಕ್ ಇಡಿ ರಟ್ ದ್ ಅಂಗಿ ಹಾಲಾಪುಂಡು ಪಂದ್ ಪಿರಾಕ್ ದಕುಲು ಇಂಚ ಪೋಂದು ಇತ್ತೆರ್ ಆದಿಪ್ಪು.
ಅಂಚ ಕಂತಿನ ಪಾಲೆನ್ ಪೊರ್ಲು ಪೆರೆಸ್ದ್ ಕಡೆಪಿಕಲ್ಡ್ ಓಮ, ಜೀರಿಗೆ, ಎಡ್ಡೆಮುಂಚಿ ಬೊಕ್ಕ ಬೊಲ್ಲುಲ್ಲಿ ಪಾಡ್ದ್ ಚಣ್ಣ ಗುದ್ದೊಡು. ಬೊಕ ಐತ ರಸನ್ ಪುಂಟುದು ಒಂಜಿ ಬಾಜನೊಗು ಪಾಡೊಡು. ಬೊಕ ಬೊಲ್ಲಿ ಕಲ್ ನ್ ಗೆಂಡಡ್ ಬೆಚ್ಚ ಮಲ್ತ್ ದ್ ಬೊಕ ಐತ ಮಿತ್ ಒಂತೆ ಎಣ್ಣೆ ಪಾರ್ದ್ ಅವೆನ್ ಕಸಾಯದ ದೀತಿನ ಬಾಜನಗ್ ಪಾಡೊಡು. ಇಂದು ಪಾಲೆ ಕೈಪೆ ಆಂಡಲ ಇಂದೆನ್ ಪೂರೆರ್ಲ ಕಾಂಡೆ ಬಜಿ ಬಂಜಿಗ್ ಪರೊಡು. ಇಂದೆನ್ ಜೊಕುಲೆಗ್ ಕಾಲು ಲೋಟೆ ಕೊರ್ಪೆರ್ ಮಲ್ಲಕ್ಲೆಗ್ ಅರ್ಧ ಲೋಟೆ ಕೊರ್ಪೆರ್. ಇಂದು ಏತ್ ಎಡ್ಡೆನಾ, ಜೀವಗ್ ಆತೆ ಉಷ್ಣ ಐಕ್ ಜೀವದ ತಂಪುಗು ಬೊಡಾದ್ ಮೆತ್ತೆದ ಗಂಜಿ ಮಲ್ತದ್ ತಿನ್ಪೆರ್.
ಪಾಲೆದ ಕಸಾಯ ಪರ್ಪುನ ಪಿರವುಡು ವೈಜ್ಞಾನಿಕ ಕಾರನೊಲುಲಾ ಉಂಡು:
ಈ ಪಾಲೆದ ಕಸಾಯ ಪರ್ಪುನ ಖಾಲಿ ಒಂಜಿ ಕಟ್ಟಲೆ ಅತ್ ಐತ ಪಿರವುಡು ಕೆಲವು ವೈಜ್ಞಾನಿಕ ಕಾರನೊಲುಲ ಉಂಡು. ತುಳುನಾಡ್ಡ್ ಬರ್ಸ ಎಚ್ಚಾಯಿಲೆಕನೆ ಜನಕ್ಲೆಗ್ ಸೀಕ್ ಸಂಕಡೊಲು ಸುರು ಆಪುಂಡು. ಚರ್ಮರೋಗೋಲು, ಸಾಂಕ್ರಾಮಿಕ ರೋಗೋಲು ಬರ್ಪುಂಡ್. ನೆತ್ತ ಒಟ್ಟುಗು ಜನಕ್ಲೆನ ಜೀರ್ಣ ಶಕ್ತಿ ಕಮ್ಮಿ ಆಪುಂಡು ಬೊಕ ದೇಹದುಲಯಿ ರೋಗ ನಿರೋಧಕ ಶಕ್ತಿ ತಗ್ಗುಂಡು. ಅಂಚಾದ್ ಈ ಪಾಲೆ ಮರತ್ತ ಮರ್ದ್ನ್ ವರ್ಸಡ್ ಒರ ಪರ್ಪುನ ಸಂಪ್ರದಾಯನ್ ಈ ಜನಕುಲು ಮಲ್ತೊಂದು ಬೈದೆರ್ ಈ ಮರ್ದ್ ಪರುಂಡ ಇಡೀ ವರ್ಷ ಬೇತೆ ವಾ ಮರ್ದ್ ಲ ಬೊರ್ಚಿ ಪನ್ಪುನ ನಂಬೊಲಿಗೆಲ ಉಂಡು. ಬೊಕ ಆಟಿ ಕರೀದ್ ಬರ್ಪುನ ಸಾಲ್ ಸಾಲ್ ಪರ್ಬೊಲೆಡ್ ಚೀಪೆದ ತೆನಸ್ ತಿನ್ಪುನ ಕಾರಣ ಬಂಜಿಗ್ ಸಂಬಂಧಿತ ರೋಗೊಲು ಬರ್ಪುನ ಸಂಭವ ಉಂಡು ಐಕ್ ಇ ಮರ್ದ್ ಪರುಂಡ ಅವ್ ರೋಗೊಲೆನ್ ತಡೆಪೊಲಿ.
ಈ ಪಾಲೆ ಮರ ಅತ್ತಂಡ ಮದ್ದಾಲೆ ಮರ ಇಂದು ಬರೀ ಬಿತ್ ಲುದ ಮರ್ದತ್ ಇಂದೆತ ಗುಣ, ಉಪಯೋಗೋದ ಬಗ್ಗೆ ಆಯುರ್ವೇದ ಡ್ಲ ಉಲ್ಲೇಕೊ ಉಂಡು. ಇಂದೆತ ಇರೆ ಏಲ್ ದಲತ ಆಯಿನದಾತ್ರ ನೆಕ್ ಸಪ್ತಪರ್ಣ ಪಂದ್ ಲೆಪ್ಪುವೆರ್. ನೆತ್ತ ಬೇರ್ ಬೊಕ ಕೆತ್ತೆದ ರುಚಿ ಕಯಿಪೆ ಬೊಕ ಖಾರಲೆಕ ಉಪ್ಪುಂಡು. ಆಂಡ ಮರ್ದದ ಗುಣಟ್ ಇಂದು ಬಾರಿ ಸ್ರೀಮಂತ ಮರ. ಜ್ವರ, ಮಲೇರಿಯ, ಚರ್ಮರೋಗೋಲು, ಫಂಗಸ್ ಸೋಂಕುಲು, ಅರ್ಟಿಕೇರಿಯಾ, ಜಿಲಬು ಬೊಕ ಅಸ್ತಮೊಲೆಗ್ ಉಂದು ರಾಮಬಾಣದ ಲೆಕ. ನೆತ್ತ ರಸಟ್ ನೆತ್ತರ್ ಸುದ್ಧ ಮಲ್ಪನ, ಮೈ ಕಿರ್ಂಬುನ, ಉರಿ ಪುರ ಉಂತುಂಡು. ಆತೆ ಅತ್ ಉಚ್ಚು ತುಚ್ಚಿನೆಕ್ಲ ಈ ಮರ್ದ್ ನ್ ಕೊರ್ಪೆರ್.
ನೆತ್ತ ಒಟ್ಟಿಗೆ ಪೆದ್ಮೆದಿಲ್ಲೆನ ಮಿರೆ ಪೇರ್ ಜಾಸ್ತಿ ಅವೆರೆ ಈ ಕಸಾಯ ಕೊರ್ಪೆರ್. ಈ ಕಾಲೆ ಕಯಿಪೆ ರುಚಿ ನಮ್ಮ ಬಂಜಿದುಲಯಿ ಇತ್ತಿನ ಮಿಜಿಲೆ ಪುರಿಕ್ಲೆನ್ ನಾಸ ಮಲ್ಪುಂಡು, ಜಠರನ್ ಸುದ್ಧ ಮಲ್ಪುಂಡು. ಚೀಪೆಪಡಿಕೆ (ಮಧುಮೇಹ) ಸೀಕ್ ದಕುಲು ಪಾಲೆ ಕಸಾಯ ಪರ್ಂಡ ಅಕ್ಲೆನ ಅತಿ ಮೂತ್ರ ನಿಯಂತ್ರಣ ಗ್ ಬಪುರ್ಂಡು. ಗಾಯಲೆಗ್ಲ ಈ ಕೆತ್ತೆದ ರಸ ಪಾಡಂಡ ಬೇಗ ನುಂಗುಂಡು. ನೆತ್ತ ಚೊಲಿನ್ ನೀರ್ ಡ್ ಅರೆತ್ ದ್ ಸಂಧಿಲೆಗ್ ಪೂಜಿಂಡ ಸಂಧಿವಾತ, ವಾಯು ವಿಕಾರೊಲು ಗುಣ ಆಪುಂಡು. ಇಂದು ಕರ್ಲದ ಕ್ಯಾನ್ಸರ್ ಬೊಕ ಕುಸ್ಟ ರೋಗಗ್ಲ ಎಡ್ಡೆ ಪಂದ್ ಇಂಚೊದ ಒಂಜಿ ಸಂಶೋಧನೆ ಡ್ ತೆರಿದ್ ಬಯಿದ್ಂಡ್. ಇಂಚಿನ ಒಂಜಿ ಜೌಷಧೀಯ ಗುಣ ಇತ್ತಿನಂಚಿನ ಈ ಪಾಲೆನ್ ತುಳುನಾಡ್ದು ರೋಗ ಬರಂದಿಲೆಕ ಬೊಕ ಸರೀರದ ಆಂತರಿಕ ಶಕ್ತಿನ್ ಬುಲೆಪಾವುನ ನಿಟ್ ಡ್ ಆಟಿ ಅಮಾಸೆದಾನಿ ಪರ್ಪೆರ್. ಇಂಚ ಕಾಲಾಗ್ ತಕ್ಕ ತೆನಸ್ ಬೊಕ ಜೀವನ ಸೈಲಿನ್ ಸಂಪ್ರದಾಯಿಕ ಆಚರನೆದೊಟ್ಟುಗ್ಗು ನಡಪಾವೊಂದು ಪೋಪೆರ್ ತುಳುವೆರ್.
ಡಾ. ಮಹೇಶ್ ಶರ್ಮಾ, ಬೆಂಗಳೂರು
ಅನುವಾದ- ನಿವೇದಿತಾ ಕೋಟ್ಯಾನ್, ಮಂಗಳೂರು
