ನಿಜ ಹೇಳಬೇಕೆಂದರೆ ಚಳಿಗಾಲ ಅನಾರೋಗ್ಯ ಸಮಸ್ಯೆಗಳಿಗೆ ಅಸ್ಪದ ಮಾಡಿಕೊಡುತ್ತದೆ. ನೆಗಡಿ, ಜ್ವರ, ಆಯಾಸ, ಉಬ್ಬಸ ಹೆಚ್ಚಬಹುದು. ಮಾನಸಿಕವಾಗಿಯೂ ಸ್ವಲ್ಪ ಅಲಸಿಕೆ ಬರಬಹುದು. ಇದರಿಂದಾಗಿ ನಾವು ದೈನಂದಿನ ಜೀವನ ಶೈಲಿ, ಆರೋಗ್ಯ ಸಂರಕ್ಷಣಾ ವಿಷಯದಲ್ಲಿ ಮತ್ತಷ್ಟು ಎಚ್ಚರಿಕೆ ವಹಿಸಬೇಕಾದ ಕಾಲವಿದು. ನೀರು ಕುಡಿಯಬೇಕು ಚಳಿಗಾಲದಲ್ಲಿ ಹೆಚ್ಚಾಗಿ ಎದುರಾಗುವ ಸಮಸ್ಯೆ ಎಂದರೆ ಆವಿಯಾಗುವ ನೀರು. ದೇಹದಿಂದ ನೀರೆಲ್ಲವೂ ಆವಿಯಾಗಿ ಹೋಗುವುದು (ಡಿಹೈಡ್ರೇಷನ್) ಹೊರಗಿನ ವಾತಾವರಣ ಮತ್ತಷ್ಟು ಹೆಚ್ಚಾಗಿದ್ದಾಗ ಈ ಸಮಸ್ಯೆ ಇನ್ನಷ್ಟು ಉಲ್ಬಣಗೊಳ್ಳುತ್ತದೆ. ಆದ್ದರಿಂದ ಈ ಸೀಜನ್‍ನಲ್ಲಿ ಬಾಯಾರಿಕೆ ಆಗದೆ ಹೋದರೂ ತಪ್ಪದೇ ನೀರನ್ನು ಕುಡಿಯಬೇಕು. ಹಣ್ಣಿನ ರಸ ಕುಡಿದರೂ ತೊಂದರೆಯಿಲ್ಲ.
ಆಹಾರ ಸೇವನೆ
ಈ ಸೀಜನ್‍ನಲ್ಲಿ ವೈರಸ್‍ಗಳು ವಿಜೃಂಭಿಸಿ ನೆಗಡಿ-ಪ್ಲೂನಂತಹ ಜ್ವರ ಬರುವ ಸಂಭವ ಹೆಚ್ಚು. ಆದ್ದರಿಂದ ರೋಗ ನಿರೋಧ ಶಕ್ತಿ ಹೆಚ್ಚಾಗುವಂತೆ ಮಾಡುವ ಹಣ್ಣು-ತರಕಾರಿಗಳಿಂದ ಕೂಡಿದ ಆಹಾರ ಸೇವನೆ, ಜೊತೆಗೆ ವ್ಯಾಯಾಮ ಮಾಡಬೇಕು. ಕೆಲವರಲ್ಲಿ ಚಳಿಗಾಲವು ಡಿಪ್ರೆಷನ್ ಉಂಟು ಮಾಡುತ್ತದೆ. ಇದನ್ನು ಸೀಜನಲ್ ಅಫೆಕ್ಟಿವ್ ಡಿಜಾರ್ಡರ್ (ಎಸ್‍ಎಡಿ) ಎಂದು ಕರೆಯುತ್ತಾರೆ. ವೈದ್ಯರ ಸಲಹೆಯೊಂದಿಗೆ ದಿನವೂ ಸ್ವಲ್ಪ ಸಮಯ ಬೆಳಗಿನ ಸೂರ್ಯ ರರ್ಶಿಯಲ್ಲಿ ಓಡಾಡುವುದು ಉತ್ತಮ. ಹೃದಯದ ಆರೋಗ್ಯ ಚಳಿ ವಾತಾವರಣ ಹೃದಯದ ಭಾರವನ್ನು ಹೆಚ್ಚಿಸುತ್ತದೆ. ಒಂದು ವೇಳೆ ಹೈಬಿಪಿ ಅಥವಾ ಲೋಬಿಪಿಯಾಗಲಿ, ಹೃದಯದ ನೋವಾಗಲಿ ಸ್ವಲ್ಪ ಕಾಣಿಸಕೊಂಡರೆ ತಕ್ಷಣವೇ ವೈದ್ಯರ ಸಲಹೆ ತೆಗೆದುಕೊಳ್ಳುವುದು ಒಳಿತು.
ಚಳಿಯನ್ನು ಎದುರಿಸಲು ಶರೀರ ಸಾಕಷ್ಟು ಎಚ್ಚರಿಕೆವಹಿಸಬೇಕಿರುತ್ತದೆ. ಕನಿಷ್ಠ ಮಲಗುವ ಕೋಣೆಯಾದರೂ ಬೆಚ್ಚಗೆ ಇರುವಂತೆ ನೋಡಿಕೊಳ್ಳಬೇಕು. ಚರ್ಮ ಸಂರಕ್ಷಣೆ ತಂಪಾದ ಚಳಿಗಾಲದಲ್ಲಿ ತೇವ ಕಡಿಮೆ ಇರುವುದರಿಂದ ಚರ್ಮ ಶುಷ್ಕಗೊಂಡು ಒಣಗಿದಂತಿರುತ್ತದೆ. ನವೆಯಿಂದ ಚರ್ಮ ಬಿರುಕು ಬಿಡುತ್ತದೆ. ಇದರಿಂದ ಬ್ಯಾಕ್ಟರೀಯಾ, ಫಂಗಸ್‍ನಂತಹವು ಒಳಗೆ ಸೇರಿ ಇನ್‍ಫೆಕ್ಷನ್‍ಗಳಾಗುತ್ತವೆ. ಆದ್ದರಿಂದ ಮುಖ, ಕೈ ಕಾಲುಗಳು ಪಾದಗಳಂತಹ ಚಳಿಗೆ ಗುರಿಯಾಗರುವ ಭಾಗದಲ್ಲಿ ಸೂಕ್ತ ರೀತಿಯಲ್ಲಿ ಮಾಯಿಶ್ಚರೈಜರ್ ಲೇಪಿಸಿಕೊಳ್ಳಬೇಕು.
ಮದ್ಯ ಒಳ್ಳೆಯದಲ.್ಲ ಚಳಿಯಲ್ಲಿ ಬೆಚ್ಚಗೆ ಇರುತ್ತದೆ ಎಂದು ಆಲ್ಕೋಹಾಲ್, ಕಾಫಿಯಂತಹ ಕೆಫಿನ್ ಪಾನೀಯಗಳನ್ನು ಹೆಚ್ಚಾಗಿ ಕುಡಿಯುವುದು ಒಳ್ಳೆಯದಲ್ಲ. ಇವು ಶರೀರದಲ್ಲಿನ ಉಷ್ಣತೆಯನ್ನು ಮತ್ತಷ್ಟು ವೇಗವಾಗಿ ಹೊರಬರುವಂತೆ ಮಾಡುತ್ತದೆ. ಸೊಪ್ಪು, ಈರಳ್ಳಿ, ತಾಜಾ ಹಣ್ಣುಗಳ, ಬೆಚ್ಚಗಿನ ಹಾಲು, ಬೆಣ್ಣೆ ಉಪಯುಕ್ತ. ವ್ಯಾಯಾಮ ಮುಖ್ಯ ಚಳಿಗಾಲದಲ್ಲಿ ವ್ಯಾಯಾಮ ಮಾಡಿದಾಗ ಹೆಚ್ಚು ಕ್ಯಾಲರಿಗಳು ಖರ್ಚಾಗುತ್ತವೆ. ಚಳಿಯನ್ನು ನಿಯಂತ್ರಣದಲ್ಲಿ ಇಟ್ಟುಕೊಳ್ಳಲು, ಬೆಚ್ಚಗಾಗಲು ಶರೀರ ಕೆಲಸ ಮಾಡುವುದರಿಂದ ಬೇಸಿಗೆಗೆ ಹೋಲಿಸಿದರೆ ಈ ಸೀಜನ್‍ನಲ್ಲಿ ಶೇ. 50ರವರೆಗೂ ಕ್ಯಾಲರಿ ಖರ್ಚಾಗುತ್ತದೆ. ಇಲ್ಲದೆ ಹೋದರೆ ಶರೀರವು ಸ್ವಲ್ಪ ಬೆಚ್ಚುಗೆ ಆಗುವವರೆಗೂ ನಿಧಾನವಾಗಿ ನಡಿಗೆ ಮಾಡುವುದು ಒಳಿತು. ಆದರೆ ಮುಂಜಾನೆ ನಡೆಯುವ ವಿಷಯದಲ್ಲಿ ಎಚ್ಚರಿಕೆ ಅಗತ್ಯ.
ಬೇಸಿಗೆ, ಮಳೆಗಾಲದಂತೆ ಚಳಿಗಾಲದಲ್ಲೂ ಕೆಲವು ಆನಾರೋಗ್ಯ ಸಮಸ್ಯೆಗಳು ಕಾಡುತ್ತವೆ. ಚಳಿಗಾಲದಲ್ಲಿ ಆರೋಗ್ಯ ರಕ್ಷಣೆ ಮತ್ತು ದೈಹಿಕ ಆರೈಕೆಯೂ ಅಷ್ಟೇ ಮುಖ್ಯ. ಚಳಿಗಾಲದಲ್ಲಿ ಜನರನ್ನು ಮುಖ್ಯವಾಗಿ ಕಾಡುವ ಸಮಸ್ಯೆ ಎಂದರೆ ಶೀತ ಮತ್ತು ಚರ್ಮ ಸಮಸ್ಯೆಗಳು. ವಾತಾವರಣದಲ್ಲಿ ಆದ್ರ್ರತೆ ಕಡಿಮೆ ಇರುವುದರಿಂದ ಚರ್ಮಕ್ಕೆ ಸಂಬಂಧಪಟ್ಟಂತೆ ಕಾಯಿಲೆಗಳು ಬರಬಹುದು. ಅಲ್ಲದೇ ಈಗಿರುವ ಚರ್ಮ ರೋಗಗಳು ಉಲ್ಬಣಗೊಳ್ಳುವ ಸಾಧ್ಯತೆಗಳೂ ಹೆಚ್ಚು.
ತುಟಿಯ ಬಿರಿಯುವಿಕೆ ಚಳಿಗಾಲದಲ್ಲಿ ಸಾಮಾನ್ಯ. ತುಟಿಗಳ ಮೇಲೆ ಅಗಾಗ ನಾಲಿಗೆಯಿಂದ ಸವರುವುದು, ತುಟಿಯ ಮೇಲ್ಪದರವನ್ನು ಕಚ್ಚುವುದು ಬೇಡ. ತುಟಿಗಳು ಒಣಗಿವೆ ಎನಿಸಿದರೆ ಪೆಟ್ರೋಲಿಯಂ ಜೆಲ್ಲಿ ಲೇಪಿಸಿಕೊಳ್ಳಿ. ಮಹಿಳೆಯರು ಬಳಸುವ ಲಿಪ್‍ಸ್ಟಿಕ್ ತುಟಿಯ ಚರ್ಮವನ್ನು ಬಾಗುವಂತೆ ಮಾಡುವುದರಿಂದ ಚಳಿಗಾಲ ಮುಗಿಯುವ ತನಕ ಅದರಿಂದ ದೂರವಿರಬೇಕು. ಬೆಳಗ್ಗಿನಿಂದ ಸಂಜೆಯ ತನಕ ಕೆಲಸ ಕಾರ್ಯಗಳ ನಿಮಿತ್ತ ಮನೆಯಿಂದ ಹೊರಗೆ ಇರುವವರು ವ್ಯಾನಿಟಿ ಬ್ಯಾಗ್‍ಗಳಲ್ಲಿ ಜೆಲ್ಲಿಯ ಟ್ಯೂಬ್ ಇಟ್ಟುಕೊಳ್ಳುವುದು ಉತ್ತಮ.
ಚಳಿಗಾಲದಲ್ಲಿ ಬಿಸಿ ಬಿಸಿ ನೀರಿನಿಂದ ಸ್ನಾನ ಮಾಡಬೇಕೆಂದು ಮನ ಬಯಸುತ್ತದೆ. ಇನ್ನಷ್ಟು, ಮತ್ತಷ್ಟು ಮಾಡುತ್ತಲೇ ಇರಬೇಕೆನಿಸುತ್ತದೆ. ಚಳಿಗಾಲದಲ್ಲಿ ಅತಿಯಾದ ಬಿಸಿ ನೀರಿನ ಸ್ನಾನ ಒಳ್ಳೆಯದಲ್ಲ. ಏಕೆಂದರೆ ಬಿಸಿ ನೀರು ನಿಮ್ಮ ಚರ್ಮದ ತೇವವನ್ನು ಕಸಿಯುತ್ತದೆ. ಚಳಿಗಾಲದಲ್ಲಿ ಸ್ನಾನದ ಅವಧಿಯನ್ನು ಮೊಟಕುಗೊಳಿಸುವುದೇ ಉತ್ತಮ. ನಿಮ್ಮ ಅನುಕೂಲಕ್ಕೆ ಅನುಗುಣವಾಗಿ ಹದವಾದ ಬಿಸಿ ನೀರು, ಉಗುರು ಬೆಚ್ಚಗಿನ ನೀರನ್ನು ಉಪಯೋಗಿಸಿ. ಮುಖ ತೊಳೆದುಕೊಂಡರೆ ಮೃದುವಾದ ಸೋಪ್ ಬಳಸಿ. ತಣ್ಣೀರಿನಿಂದ ಮುಖ ತೊಳೆದುಕೊಂಡರೆ ಅದು ಬಿರಿಯುವುದಾಗಲಿ ಅಥವಾ ಉರಿಯುವಂಥ ಸಮಸ್ಯೆಯಾಗಲಿ ಇರುವುದಿಲ್ಲ. ಸ್ನಾನದ ನಂತರ ಕಾಲುಗಳಿಗೆ ಮಾಯಿಶ್ಚರೈಸರ್ ಲೇಪಿಸಿಕೊಂಡರೆ ಕಾಲುಗಳಿಗೆ ಒಳ್ಳೆಯದು. 
ಸ್ನಾನಕ್ಕೆ ಮುನ್ನ ಹತ್ತರಿಂದ ಹದಿನೈದು ನಿಮಷಗಳ ಕಾಲ ಕೊಬ್ಬರಿ ಅಥವಾ ಆಲಿವ್ ಎಣ್ಣೆಯಿಂದ ಶರೀರಕ್ಕೆ ಮರ್ದನ ಮಾಡಿಕೊಂಡರೆ ಚರ್ಮ ಒಡೆಯದೆ, ಹೊಳಪನ್ನು ಪಡೆದುಕೊಳ್ಳುತ್ತದೆ. ಈ ಸೀಜನ್‍ನಲ್ಲಿ ತಣ್ಣೀರಿನ ಸ್ನಾನ ಕಷ್ಟವೇ ಸರಿ. ಹಾಗೆಯೇ ಅತಿಯಾದ ಬಿಸಿ ನೀರಿನಿಂದಲೂ ಸ್ನಾನ ಮಾಡಬಾರದು. ಬಿಸಿ ನೀರು ಚರ್ಮದ ಮೇಲೆ ತೇವವನ್ನು ತೊಲಗಿಸುತ್ತದೆ. ಆದ್ದರಿಂದ ಸ್ನಾನಕ್ಕೆ ಉಗುರು ಬೆಚ್ಚಗಿನ ನೀರು ಉತ್ತಮ.
ನೀರಿನಂಶ ಹೊಂದಿರುವ ಮಾಯಿಶ್ಚರೈಸರ್‍ಗಿಂತ ಎಣ್ಣೆ ಅಂಶ ಹೊಂದಿರುವ ಮಾಯಿಶ್ಚರೈಸರ್ ಬಳಸುವುದರಿಂದ ಚರ್ಮ ಮೃದುತ್ವವನ್ನು ಕಾಪಾಡಿಕೊಳ್ಳಬಹುದು. ಇದು ಚರ್ಮದ ಮೇಲೆ ಆದ್ರ್ರತೆಯ ಪದರ ನಿರ್ಮಾಣ ಮಾಡುತ್ತದೆ. ಇದರಿಂದಾಗಿ ಚರ್ಮ ಒಣಗುವಿಕೆಯಿಂದ ಪಾರಾಗಬಹುದು. ನೀವು ಖರೀದಿಸುವ ಲೋಷನ್‍ಗಳ ಲೇಬಲ್ ಮೇಲೆ ನೈಟ್‍ಕ್ರಿಮ್ ಎಮದು ಬರೆದಿದ್ದರೆ ಅದು ಎಣ್ಣೆ ಅಂಶ ಹೊಂದಿರುವ ಮಾಯಿಶ್ಚರೈಸರ್ ಎಂದರ್ಥ. ಸೋಪಿನಲ್ಲೂ ಸಹ ಗಾಢತೆ ಕಡಿಮೆ ಇದ್ದು, ಎಣ್ಣೆ ಹೆಚ್ಚಾಗಿರುವುದನ್ನುಆಯ್ಕೆ ಮಾಡಿಕೊಳ್ಳಬೇಕು. ಸ್ನಾನ ಮಾಡಿದ ಬಳಿಕ ಚರ್ಮ ಇನ್ನೂ ಒದ್ದೆಯಾಗಿರುವಾಗಲೇ ಮುಖ, ಕೈಗಳು, ಮುಂಗೈಗಳಿಗೆ ಮಾಯಿಶ್ಚರೈಜರ್ ಕ್ರೀಂ ಲೇಪಿಸಿಕೊಳ್ಳಬೇಕು. ಇದರಿಂದ ಚರ್ಮದ ಮೇಲ್ಪದರ ಆದ್ರ್ರತೆ ಹಾಗೆ ಉಳಿದಿರುತ್ತದೆ. ಶುಷ್ಕಗೊಳ್ಳದಂತೆ, ನವೆ ಉಂಟಾಗದಂತಿರುತ್ತದೆ. ತುಟಿಗಳಿಗೆ ಸ್ವಚ್ಛವಾದ ತುಪ್ಪ ಇಲ್ಲವೇ ಪೆಟ್ರೋಲಿಯಂ ಜೆಲ್ಲಿಯಂತಹವನ್ನು ಲೇಪಿಸಿಕೊಳ್ಳುವುದು ಒಳಿತು.
ಚರ್ಮದ ಮೃದುತ್ವ ರಕ್ಷಣೆ
- ಚಳಿಗಾಲದಲ್ಲಿ ಚರ್ಮದ ಮೃದುತ್ವದ ಕಡೆಗೂ ಗಮನ ನೀಡುವುದು ಮುಖ್ಯ. ಸಾಸಿವೆ ಹಾಗೂ ಔಡಲ ಎಣ್ಣೆಗಳನ್ನು ಸಮ ಪ್ರಮಾಣದಲ್ಲಿ ತೆಗೆದುಕೊಂಡು ಮೈಗೆ ಲೇಪಿಸಿಕೊಳ್ಳಿ. ಅರ್ಧ ಗಂಟೆ ಕಳೆದು ಸ್ನಾನ ಮಾಡಿದರೆ ಚರ್ಮ ಮೃದುವಾಗಿ ನಿಮ್ಮನ್ನು ಉಲ್ಲಾಸಗೊಳಿಸುತ್ತದೆ. ವಾರಕ್ಕೊಮ್ಮೆಯಾದರೂ ಎಣ್ಣೆ ಸ್ನಾನ ಮಾಡುವುದು ಚರ್ಮದ ಆರೋಗ್ಯ ದೃಷ್ಟಿಯಿಂದ ತುಂಬಾ ಒಳ್ಳೆಯದು.
- ಚಳಿಗಾಲದಲ್ಲಿ ಗಡುಸಾದ ಸೋಪುಗಳ ಬಳಕೆ ಬೇಡ. ಕಠಿಣ ಸೋಪುಗಳ ಬಳಕೆಯಿಂದ ಕೈ ಚರ್ಮ ಉರಿಯುತ್ತದೆ. ತುರಿಕೆ ಕಾಣಿಸಿಕೊಳ್ಳುತ್ತದೆ. ಕೈಗಳಲ್ಲಿ ತೈಲ ಗ್ರಂಥಿಗಳು ಕಡಿಮೆ ಇರುವುದೇ ಇದಕ್ಕೆ ಕಾರಣ. ನೊರೆಯುಳ್ಳ ಸ್ನಾನದ ಜೆಲ್‍ಗಳನ್ನು ಬಳಸಿದರೆ ಮೃದುತ್ವ ಕಾಪಾಡಿಕೊಳ್ಳಬಹುದು.
- ವಾತಾವರಣದಲ್ಲಿನ ಆದ್ರ್ರತೆ ಕೂದಲರನ್ನು ಒಣಗಿಸಿ ಬಿಡುತ್ತದೆ. ಆದ್ದರಿಂದ ಆದಷ್ಟೂ ಕಡಿಮೆ ತಲೆ ಸ್ನಾನ ಮಾಡುವುದು ಒಳ್ಳೆಯದು. ತಲೆಗೂದಲಿನಿಂದ ಎಣ್ಣೆಯಂಶ ತೆಗೆಯಬೇಕಾದರೆ ಡ್ರೈ ಶ್ಯಾಂಪೂ ಬಳಸಿದರಾಯಿತು.
- ಪಾದಗಳನ್ನು ನೀರಿನಲ್ಲಿ ಇರಿಸಿ ನಂತರ ಪೆಟ್ರೋಲಿಯಂ ಜೆಲ್ಲಿಯಂಥ ಜೆಲ್ಲಿ ಅಥವಾ ಗ್ಲಿಸರಿನ್ ಹೊಂದಿರುವ ಲೋಷನ್ ಹಚ್ಚಿಕೊಳ್ಳಿ. ಪಾದಗಳು ಮೃದುವಾಗುತ್ತವೆ.
- ಬೆಳಗಿನ ಜಾವದ ವಾಕಿಂಗ್, ಸಂಜೆಯ ವಾಯುವಿಹಾರ, ರಾತ್ರಿ ನಡಿಗೆ ವೇಳೆ ಮಪ್ಲರ್, ಸ್ವೆಟರ್, ಮಂಕಿ ಕ್ಯಾಪ್ ಬಳಸಿ. ಚಳಿಯಿಂದ ಆರೋಗ್ಯ ರಕ್ಷಿಸಿಕೊಳ್ಳಿ. ಮುಖ್ಯವಾಗಿ ಕಿವಿಗಳಿಗೆ ರಕ್ಷಣೆ ಬೇಕು.
ಸನ್ ಸ್ಕ್ರೀನ್‍ಗಳ ಉಪಯೋಗ
- ಸನ್ ಸ್ಕ್ರೀನ್‍ಗಳ ಬಳಕೆ ಕೇವಲ ಬೇಸಿಗೆ ಕಾಲಕ್ಕೆ ಮಾತ್ರ ಸೀಮಿತವಾಗಿರುವುದಿಲ್ಲ. ಚಳಿಗಾಲದ ಬಿಸಿಲು ಕೂಡ ನಿಮ್ಮ ಚರ್ಮದ ಆದ್ರ್ರತೆಯನ್ನು ಕದ್ದೊಯ್ಯಬಹುದು. ಆದ್ದರಿಂದ ಮನೆಯಿಂದ ಹೊರಡುವ ಅರ್ಧ ಗಂಟೆ ಮೊದಲು ಸನ್‍ಸ್ಕ್ರೀನ್ ಲೇಪಿಸಿಕೊಳ್ಳುವುದು ಉತ್ತಮ.
- ಒದ್ದೆಯಾದ ಕೈಗವಸು (ಗ್ಲೌವ್ಸ್), ಕಾಲು ಚೀಲಗಳ (ಸಾಕ್ಸ್) ಬಳಕೆ ಬೇಡ. ಒದ್ದೆಯಾದ ಕೈಗವಸು, ಕಾಲುಚೀಲಗಳನ್ನು ಬಳಸುವುದರಿಂದ ಚರ್ಮದಲ್ಲಿ ನವೆ, ಕಡಿತ, ಕೆರೆತ, ತುರಿಕೆ ಉಂಟಾಗಬಹುದು. ಅಲ್ಲದೇ ಎಕ್ಸಿಮಾ ಎಂಬ ಚರ್ಮ ರೋಗವಿದ್ದರೆ ಅದು ಉಲ್ಬಣಗೊಳ್ಳುತ್ತದೆ.
- ಚಳಿಗಾಲದಲ್ಲಿ ನಿಮ್ಮ ಜೀವನ ಶೈಲಿಯಲ್ಲಿ ಕೆಲವೊಂದು ಬದಲಾವಣೆಗಳನ್ನು ಮಾಡಿಕೊಳ್ಳುವುದರಿಂದ ಚಳಿಗಾಲವನ್ನು ಮಧುರವಾಗಿ ಕಳೆಯಬಹುದು.
ತ್ವಚ್ಚೆಯ ಆರೈಕೆಗೆ ಹಿತಕರ ಸಲಹೆ
- ಆಯುರ್ವೇದದಲ್ಲಿ ಚಳಿಗಾಲವನ್ನು ಹೇಮಂತ ಋತುವೆಂದು ಹೇಳಲಾಗಿದ್ದು, ನವೆಂಬರ್‍ನಿಂದ ಆರಂಭವಾಗಿ ಜನವರಿಯಲ್ಲಿ ಕೊನೆಗೊಳ್ಳುತ್ತದೆ.
- ಹಾಲು ಮತ್ತು ಅದರಿಂದ ತಯಾರಿಸಿದ ಪದಾರ್ಥಗಳಾದ ಬೆಣ್ಣೆ, ತುಪ್ಪ ಮುಂತಾದವುಗಳನ್ನು ನಿಮ್ಮ ದಿನ ನಿತ್ಯದ ಆಹಾರದಲ್ಲಿ ಅಳವಡಿಸಿಕೊಳ್ಳಿ.
- ಆಯುರ್ವೇದದಲ್ಲಿ ಹೇಳಿರುವಂತೆ, ಸಾಕಷ್ಟು ಪ್ರಮಾಣದಲ್ಲಿ ನೀರನ್ನು (ಬಿಸಿ ನೀರು) ಸೇವಿಸಿ ನಿಮ್ಮ ಶರೀರದ ನೀರಿನಾಂಶವನ್ನು ನಿಯಂತ್ರಣದಲ್ಲಿ ಇಡಬೇಕು.
- ಸಿಹಿ, ಹುಳಿ ಮತ್ತು ಉಪ್ಪಿನ ರಸ ಹೊಂದಿರುವ ಆಹಾರ ಪದಾರ್ಥಗಳನ್ನು ಹೆಚ್ಚಾಗಿ ಸೇವಿಸಿ. ಖಾರ, ಸಿಹಿ ಮತ್ತು ಒಗರು ರಸವುಳ್ಳ ಆಹಾರ ಪದಾರ್ಥಗಳ ಬಳಕೆಯನ್ನು ಕಡಿಮೆ ಮಾಡಬೇಕು.
- ಸಾಧ್ಯವಾದಷ್ಟೂ ತಣ್ಣಗಿನ ಪಾನೀಯ ಮತ್ತು ಪದಾರ್ಥಗಳನ್ನು ಸೇವಿಸಬಾರದು.
- ಮೊಳಕೆ ಕಾಳು ಮತ್ತು ಶುಷ್ಕ ಫಲಗಳಾದ ಬಾದಾಮಿ ಮತ್ತು ಗೋಡಂಬಿ ಇತ್ಯಾದಿ ಸೇವಿಸಿ.
- ಎಂದಿನಂತೆ ಹೆಚ್ಚು ನೀರಿನಾಂಶ ಮತ್ತು ನಾರಿನಂಶವುಳ್ಳ ಹಣ್ಣು ಮತ್ತು ತರಕಾರಿಗಳನ್ನು ಸೇವಿಸಿ. ಅದರಲ್ಲೂ ಹಸಿ ತರಕಾರಿಗಳನ್ನು ಸೇವಿಸುವುದರಿಂದ ತುಂಬಾ ಉಪಯುಕ್ತವಾಗುತ್ತದೆ.
- ಜೇನುತುಪ್ಪ, ಹಾಲು, ಕಬ್ಬಿನ ಹಾಲು ಮುಂತಾದವುಗಳನ್ನು ಸೇವಿಸಿ.
- ಆಯುರ್ವೇದದ ಪ್ರಕಾರ, ಸ್ನಾನಕ್ಕೆ ಬಿಸಿ ನೀರಿಗಿಂತ ಬೆಚ್ಚಗಿನ ನೀರನ್ನು ಬಳಸುವುದು ಉತ್ತಮ.
- ಚಳಿಗಾಲವು ಮುಖ್ಯವಾಗಿ ನಮ್ಮ ತ್ವಚೆಯ ಮೇಲೆ ಪರಿಣಾಮ ಬೀರುವುದರಿಂದ ಆಯುರ್ವೇದದಲ್ಲಿ ಹೇಳಿರುವಂತೆ ದಿಣವೂ ತೆಂಗಿನೆಣ್ಣೆ ಅಥವಾ ಎಳ್ಳೆಣ್ಣೆಗಳಿಂದ ಅಭ್ಯಂಗ ಅಥವಾ ಎಣ್ಣೆಯ ಮಾಲಿಶ್ ಮಾಡುವುದು ಉತ್ತಮ. ಇದರಿಂದ ಚರ್ಮ ಒಣಗಂತೆ, ಒಡೆಯದಂತೆ ತಡೆಗಟ್ಟಬಹುದು.
- ಸೋಪುಗಳ ಬದಲು ಕಡಲೆ ಹಿಟ್ಟು ಬಳಸುವುದರಿಂದ ಚರ್ಮದ ಹೊಳಪು ಹೆಚ್ಚಾಗುತ್ತದೆ.
- ಚಳಿಗಾಳಿಗೆ ಹೆಚ್ಚಾಗಿ ಚರ್ಮವನ್ನು ಒಡ್ಡದಂತೆ ಎಚ್ಚರ ವಹಿಸಿ.
- ಸಾಧ್ಯವಾದಷ್ಟೂ ಉಣ್ಣೆಯ (ಉಲ್ಲನ್) ಬಟ್ಟೆಗಳನ್ನು ಧರಿಸಿ. ದೇಹ ಬೆಚ್ಚಗಿರುವಂತೆ ನೋಡಿಕೊಳ್ಳಿ.
- ದೈನಂದಿನ ವ್ಯಾಯಾಮವನ್ನು ರೂಢಿಸಿಕೊಳ್ಳಿ.
- ಯೋಗ, ಪ್ರಾಣಾಯಾಮ ಮತ್ತು ಧ್ಯಾನಗಳಿಂದ ನಿಮ್ಮ ದಿನಚರಿಯನ್ನು ಆರಂಭಿಸಿ.
- ಆಯುರ್ವೇದದ ಗಿಡಮೂಲಿಕೆಗಳಾದ ಬೆಟ್ಟದ ನೆಲ್ಲಿಕಾಯಿ, ತುಳಸಿ, ಬೇವು, ಅಮೃತಬಳ್ಳಿ ಮತ್ತು ಅಶ್ವಗಂಧ ಮುಂತಾದವುಗಳು ಉಪಯೋಗವನ್ನು ತಿಳಿದುಕೊಂಡು ಅದನ್ನು ಬಳಸಿ.
ಡಾ|| ಮಂಜುಶ್ರೀ
ಪೂರ್ಣಾಯು ಕ್ಲಿನಿಕ್, ಎನ್‌ಹೆಚ್ ೬೬,
ಶಾನ್‌ಬಾನ್ ಟ್ರೇಡರ‍್ಸ್ ಎದುರು, ತಡಂಬೈಲು
